Në ditët e sotme është e vështirë ta mendosh jetën pa internet, televizor apo Facebook, mirëpo në vendin tonë ka edhe njerëz që nuk i njohin këto arritje të teknologjisë dhe nuk kanë akses në to.
Një rast i tillë është ai i Vullnet Dëllinjës nga fshati Sojnik i Gramshit, i cili ka 18 vite që jeton mes malesh.
Ai ka treguar se asnjë femër nuk martohet me të për shkak se fshati është shumë larg nga qyteti dhe ai jeton vetëm me 18 mijë lekë të vjetra në muaj.
Jetën e siguron duke mbledhur bimë mjekësore që e ndihmojnë të kalojë dimrin pas fitimeve që merr duke i shitur, por kur pyetet përse nuk i shfrytëzon rrjetet sociale ai thotë se as nuk e di çfarë janë.
Vullneti ka treguar për News 24:
Prej 18 vitesh gdhihem e ngrysem i vetëm. Çfarë jete është kjo. Vetë burrë e vetë grua. Më duhet të gatuaj, laj e pastroj gjithçka vetë. Më duhet të punoj për të mbijetuar. Skam askënd jam fillikat mes katër muresh. Kam tentuar disa here të martohem por sapo u tregoj se ku banoj gjithçka merr fund. Nuk vjen njeri këtu. Tani në fshat jetojnë 30 familje larg prej këndej. Dikur jetonin 200 por të gjithë kanë ikur. Kam shumë dëshirë të largohem. Po ku?. Unë marr vetëm 18 mijë lekë të vjetra në muaj. Çfarë të bëj me ato para. Nuk paguan dot asnjë llambë elektrike.Nëse dikush do të më ofronte që të banoj në shtëpinë e gruas do e mposhtja burrërinë. Por askush nuk ma jep këtë mundësi. Unë nuk kam asnjë mundësi të takoj asnjë njeri, ose që dikush të më prezantojë me dikë.
Ndërsa i pyetur për rrjetet sociale ai tha:
Çfarë janë këto. Nuk i njoh. Këtu nuk ka valë telefoni e jo më rrjete.
Në mbrëmje lexoj libra. Mi kanë dhënë mësuesit në vite që vinin në fshat. Kjo është koha ime e lirë deri sa më zë gjumi.Nuk di në do më jepet rasti një ditë të shoh botën tjetër ku jetoni ju.
