Prej pesë ditësh studentët e Universiteteve në vend janë ngritur në protesta, në mes të të cilave kanë ndodhur edhe incidente.
Ndonëse pedagogët Jani Marka dhe Arlind Qori, të dy nga Lëvizja për Universitetin kanë deklaruar se janë pro protestës, ata shpesh janë akuzuar si të politizuar.
Madje ditën e sotme pedagogun Jani Marka e përzunë nga protesta por ai ka akuzuar forumet rinore të PD-LSI duke thënë se ishin ata që ushtruan dhunë ndaj tij. Ishin një grup studentësh të cilët i kanë hequr megafonin pedagogut të Shkencave të Natyrës duke e larguar nga podiumi i improvizuar.
Marka tha:
Kjo që ndodhi sot ka të bëjë me gjithë këto ditë që kemi qenë në protestë. Veçanërisht dy ditët e fundit ka pasur dhunë ndaj vajzave aktiviste. Këtë e kanë bërë militantë të forumeve të PD dhe LSI. Këto janë fakte që aktivistët kanë filluar ti mbledhin. Po i dokumentojmë dhe po i publikojmë rastet njëri pas tjetrit. Kush janë këta që na akuzojnë? Forumet partiake, militantët e PD dhe LSI që kanë një axhendë tjetër. Ne kemi një axhendë, gjithë bashkë pedagogë e studentë të luftojmë për kauzën universitare. Axhendën e partive duhet të pyesni Lulzim Bashën, Monika Kryemadhin etj. Mesa duket për axhendën e tyre ne ishim pengesë."
Ndërsa pedagogu Qori nga Universiteti i Shkencave Sociale drejton gishtin nga krerët e partive që sipas tij duan të ndyjnë protestën e studentëve me episode dhune.
Qori tha:
Pas kësaj fushate fashiste, gënjeshtra, thirrje të hapura për dhunë, linçime qëndrojnë krerët e partive politike që duan ta ndyjnë këtë protestë autentike, duan të shpikin armiq imagjinarë të kësaj proteste ku u thërrasin ca gangsterëve që kanë me vete ose ca të rinjve të shkretë që nuk kanë alternativë tjetër, detyrohen tu shkojnë pas këtyre partive.Qëllojnë, intimidojnë, ulërasin kundër aktivistëve të Lëvizjes për Universitetin. Kanë dashur të përvetësojnë protestën gjithë këtë kohë, të dëshpëruar që nuk e kanë arritur kanë dahsur të marrin hak diku. Kanë evidentuar armiqtë e tyre. Janë hedhur aq shumë gënjeshtrra sa nuk di kujt t'iu përgjigjesh më parë.Ne çfarë nuk i kemi bërë Edi Ramës, i kemi nxirë jetën politikisht, Erion Veliajt, Lindita Nikollës. Mesa duket veprimet tona të mëparshme që kanë defaktorizuar këto partitë e tjera kanë prodhuar këtë mllef ndaj nesh. Por punë e madhe fort! Me rëndësi është që po tentojnë të shkatërrojnë protestën. Jam besimplotë që ata nuk kanë për tu çoroditur nga kjo gjë dhe do të vazhdojnë rezistencën e tyre."