Pasi u raportua se ish-komandanti i UÇK-së, Rrustem Mustafa, është i pari nga eprorët e kësaj ushtrie që do të intervistohet si i dyshuar i Gjykatës Speciale, ka folur vetë protagonisti.
Mustafa ka thënë se beson që eprorët e UÇK-së do të dalin faqebardhë nga kjo gjykatë, duke e bërë të ditur se edhe vetë e kishte përkrahur këtë gjykatë, raporton JOQ Kosova.
“Unë jam nga ata qe kam përkrahur Gjykatën Ndërkombëtare, ne duhet të mbyllim kapitullin e viteve të kaluara. Jam i sigurt se gjatë kohës së luftës në Kosovë, nuk ka krime të kryera që mund të përkufizohen si krime lufte, fjalët dhe propaganda sugjestive si dhe percepcionet e krijuara për UÇK-në e di se do të rrëzohen dhe ne edhe individualisht, eprorët e UÇK-së do të dalin faqebardhë”, ka thënë Mustafa, i njohur si Remi.
Ndërkaq, Remi është shprehur i bindur që do të dalë faqebardhë, për shkak se ai beson që nuk ka pasur krime lufte në Kosovë, mirëpo ka theksuar se përceptimi i krijuar duhet të largohet.
Avokati i tij, Arianit Koci, ndërkohë, e kishte konfirmuar se klienti i tij ishte ftuar nga Gjykata Speciale. Ai bëri thirrje që klienti i tij të mos shqetësohet nga mediat.
Ndryshe, është raportuar se janari do të jetë muaji kur Zyra e Prokurorit të Specializuar në kuadër të Dhomave të Specializuara, do të ngritë aktakuzat e para./JOQ Kosova
