Është një nga qarqet më të mëdha, por njëherësh më të varfrit sipas statistikave vitet e fundit.
Po flasim për Kukësin, banorët e të cilit janë “shfarosur” drej emigrimit më keq se sa vendi të ishte në kohë pushtimi.
Nuk është aspak legjendë që rinia e Kukësit gjendet kryesisht në Britaninë e Madhe, në një vend ku për fatin e tyre të mirë kanë gjetur “shtëpi”, e për fatin e keq të vendit tonë që i ka ikur një “arterie” shumë e rëndësishme e shoqërisë.
Kur themi “Kukësi” nuk e kemi fjalën vetëm për qytetin, por për mbarë qarkun.
Para pak ditësh kryeministri i vendit ishte në Kukës, ku si rritje ekonomike u premtoi ndërtimin e një aeroporti, por banorët e Shishtavecit na përplasin me një kontradiktë të madhe.
Ditën e djeshme kanë qarkulluar në internet fotot e banorëve të cilët kanë ndërtuar me kontributet e tyre një burim uji, një çezmë për zonën e tyre.
Si dreqin mund të pretendosh për aeroport në një vend ku mungon uji nëpër familje?!
Çezma është bërë me kontributet monetare të secilit banor nga fshati dhe të bijve të tyre nga Anglia, siç mund të shihet në foto, duke na dhënë një shembull të mirë për funksionimin e komunitetit, aty ku e përbashkëta publike ka ende vlerë dhe koncesioni nuk ekziston.
Por, çezma nuk është e vetmja vepër e banorëve të Shishtavecit, pasi më parë ata kanë shtruar segmente të ndryshme rrugore që i çon në fshatin e tyre.
Kukësi ka bashki, ka deputet, ka edhe kryeministër ashtu si i gjithë vendi, por jo, ata janë harruar dhe kjo harresë i ka shtyrë të emigrojnë masivisht.
Nuk është çudi që nga shifrat e fundit të OKB-së, Shqipëria rezulton si vendi që po plaket me ritmet më të shpejta (këtu).
Qeveria po shkelmohet përditë nga reagimet e popullit, por fakti është që shkelmat janë të ndarë dhe nuk e kanë kurrsesi forcën e privatëve që tërheqin për hunde pushtetin politik./ JOQ Albania