Vijon ndotja mjedisore jo vetëm në Durrës, ku çdo mëngjes e kemi dokumentuar renë e tymit vdekjeprurës që ngrihet mbi qytet, por edhe në Divjakë.
Ky është qyteti i fundit, i cili po raporton probleme të shumta ditë pas dite, të cilat kanë të bëjnë me procesin e mbledhjes së ullirit dhe mbeturinat që ngelin nga ai, pasi bëhet vaj.
Siç mund ta shikoni nga fotot e publikuara në JOQ.al, një numër i madh peshqish kanë ngordhur për shkak të derdhjes së mbetjeve të fabrikave që prodhojnë ullirin, në Lushnje e Divjakë, në kanalin e Divjakës.
Më konkretisht, këto pamje janë realizuar ditën e sotme në hidrovorin Bishçukas, Divjakë.
Banorët e zonës pyesin në se deputeti i tyre i dashur, Erjon Braçe, i cili thotë se viziton çdo ditë çdo pëllëmbë të vendit ku është zgjedhur nga populli e takohet me qytetarët, ka arritur ta dëgjojë e ta shikojë këtë pamje, apo diçka i ka shpëtuar këto kohët e fundit.
Ata janë të shqetësuar se pse askush nuk po reagon ndaj kësaj masakre të mirëfilltë mjedisore, ku qindra peshq po ngordhin e uji po ndotet.
Apo mos vallë biznesi vendas ua ka mbyllur gojën të plotfuqishmëve?
Deri më tani, asnjë reagim nga deputeti Braçe...
