Prej disa javësh tanimë vendi ynë po regjistron shifra rekord të infektuarish me Covid dhe variantet që janë në qarkullim. Tirana, si kryeqyteti i vendit dhe me më shumë banoorë qëndron në krye të listës për rekordet e vazhdueshme për sa i përket numrit të të infektuarve me Covid-19. Qytetarë të shumtë i janë drejtuar qendrave të testimit për të kryer tampone pasi edhe varianti Omicron po qarkullon me shpejtësi. Epidemiologu Rexhep Muja, identifikon zonat më rrezikshme të Tiranës, sa i përket infektimit me Sars Cov 2.
Sipas epidemiologut, rastet më të shumta të infektimeve po konfirmohen në vatrat familjare apo institucione shtetërore, pasi kontaktet e shumta dhe qëndrimi për një kohë të gjatë në mjedise të mbyllura e rrit mundësinë e transmetimit të virusit. Në 24 orët e fundit në Tiranë janë shënuar 1120 të infektuar. Pas Tiranës, sipas ministrisë së Shëndetësisë, numrin më të lartë të infektuarve e ka Durrësi. Ministria e Shëndetësisë raporton se në 24 orët e fundit nga 7626 testime janë shënuar 2179 qytetarë të infektuar me COVID në të gjithë vendin, duke shënuar rekordin e rradhës.