Policia e Elbasanit ka arrestuar ditën e sotme një 30-vjeçar i cili ishte i dënuar me katër vite burg. Denis Meçja ishte i dënuar dhe në Itali për veprimtari kriminale në fushën e narkotikëve. Por sapo ka mbërritur në Rinas është arrestuar për një plagosje me grushta e sende të forta të ndodhur në vitin 2016 dhe për të cilën ishte dënuar me katër vite burg.
Njoftimi i policisë:
DVP Elbasan/Vihet në pranga një 30 vjeçar, i dënuar me 4 vite burg. 30 vjeçari i dënuar dhe në Itali për veprimtari kriminale në fushën e narkotikëve. Specialistët për Hetimin e Krimeve në Komisariatin e Policisë Elbasan në bashkëpunim me Policinë Kufitare të Rinasit ndaluan shtetasin në kërkim, Denis Meçja, 30 vjeç, banues në Elbasan. Ndalimi i tij u bë pasi Gjykata e Rrethit Gjyqësor Elbasan, në vitin 2017, e ka dënuar me 4 vite burgim për veprën penale “Plagosje e rëndë me dashje” e kryer në bashkëpunim.
Ky shtetas më datë 24.05.2016 në një lokal, ka goditur me grushta e sende të forta, shtetasin B. K., me banim Elbasan, duke i shkaktuar plagë të rënda. Shtetasi Denis Meçja prej vitit 2017 deri në nëntor 2021 ishte në burg në Itali për veprimtari kriminale në fushën e narkotikëve. Materialet shtesë i kaluan Prokurorisë, për veprime të mëtejshme procedurale.
