Detaje të reja janë zbardhur në lidhje me ngjarjen e rëndë që tronditi vendin tonë ditën e sotme, pasi një efektiv policie u vra në krye të detyrës. Saimir Hoxha dhe kolegët e tij kishin shkuar për të kontrolluar një territor me kanabis kur gjatë verifikimit të një makine u qëllua për vdekje nga 21-vjeçari Aldi Rama. Sipas "BW" dhe hetimeve nga dosja e Prokurorisë thuhet se ditën e sotme Policia e Shtetit ishte informuar se në Ishullin e Lezhës kishte një parcelë me kanabis.
Menjëherë pas këtij informacioni, policia ka lajmëruar policinë e Lezhës e cila ka nisur drejt kësaj zone një grup inspektimi të përbërë nga tre persona, i kryesuar nga shefi i krimeve, viktima dhe një koleg tjetër. Pas dy orë kërkimesh, policia arriti që të gjente parcelën me kanabis dhe e shkatërroi atë. Mësohet se në këtë zonë ku ka ndodhur ngjarja e rëndë ka shumë kamera sigurie të cilat kanë filmuar edhe skenën e krimit.
Por teksa oficerët e policisë po ktheheshin për në Komisariat kanë parë një automjet të dyshimtë dhe i kanë kërkuar të ndalojë. Brenda mjetit mësohet se kanë qenë 3 persona, Armando Marku, Kristian Sheri dhe Aldi Rama, ky i fundit autori i dyshuar i ngjarjes. Sipas të dhënave, makinën po e drejtonte Armando Marku. Gjatë bisedës oficeri i ndjerë ka tentuar që të ndalojë Aldi Ramën. Lala tha se polici i ka bërë thirrje të riut që të identifikohej. “Ndalo! Unë jam punonjës i policisë dhe dua që të identifikohesh”. Por në atë momentet ai nuk është ndalur, por ka qëlluar 2 herë në zemër efektivin, duke i marrë atij jetën. Dy personat e tjerë me të cilët ishte Aldi Rama, janë aktualisht të shoqëruar në polici.
Ndërkohë para pak minutash policia njoftoi se Aldi Rama i cili vijonte të ishte në kërkim nga policia është arrestuar i vetëplagosur.
