Policia ka shoqëruar në Komisariat dy persona pas vrasjes së efektivit Saimir Hoxha në Lezhë. Mësohet se dy personat e shoqëruar nga policia janë drejtuesi i mjetit dhe pasagjeri, të cilët ndodheshin me autorin kur ai qëlloi oficerin e policisë. Sipas "BW" ata do të pyeten nga policia për vendndodhjen e mundshme të autorit 21-vjeçar Aldi Rama dhe detajeve të tjera në lidhje me këtë ngjarje.
Ndërkohë kujtojmë se efektivi Saimir Hoxha dhe një grup i anti-drogës kishin shkuar për kontroll terrritori në Lezhë pas dyshimeve se mund të kishte kultivim lëndësh narkotike. Por gjatë monitorimit policia ka konstatuar një makinë, dhe kur Saimir Hoxha ka shkuar për të parë se kush ishte 21-vjeçari e ka qëlluar me një plumb në zemër nga një distancë e afërt. Në këtë moment, dy personat e tjerë që ndodheshin në makinë kanë zbritur ndërsa Aldi Rama është arratisur dhe pasi ka bërë rreth 3 km ka braktisur mjetin.
