Për herë të parë në parlamentin gjerman do të futen dy transgjinore, pasi arritën të fitonin mandatin e tyre në zgjedhjet e së dielës. Tessa Ganserer dhe Nyke Slawik përfaqësuan partinë e të Gjelbërve, e cila doli e treta në zgjedhje, duke rritur numrin e votave të fituara në 14.8% nga 8.9% krahasuar me vitin 2017 dhe do të luajë një rol kryesor në ndërtimin e një koalicioni të ri tripalësh. Prioriteti kryesor i Ganserer, që ka qenë zgjedhur në qeverisjen vendore të Bavarisë në 2013, është të lehtësojë procesin e miratimit të ndryshimit të gjinisë të përcaktuar në dokumentet zyrtare. Ndër të tjera, Ganserer, që ka dy djem, dëshiron ndryshime në ligj në mënyrë që nënat homoseksuale të adoptojnë fëmijë.
"Është një fitore historike për të Gjelbrit, por edhe për lëvizjen "trans-emancipuese" dhe për të gjithë komunitetin LGBT"– tha Ganserer, 44 vjeç, për Reuters, duke shtuar se rezultatet ishin një simbol i një shoqërie të hapur dhe tolerante. Nga ana tjetër 27-vjeçarja Slawik, tha se rezultatet ishin të pabesueshme. Ajo siguroi një vend në parlament përmes listës së kandidatëve të Partisë së Gjelbër në shtetin perëndimor të Nordrhein-Westfalen. "Çmenduri! Unë ende nuk mund ta besoj plotësisht, por me këtë rezultat historik të zgjedhjeve do të jem patjetër anëtare e Bundestagut të ardhshëm"-u shpreh Slawik në një postim në Instagram. Slawik ka bërë thirrje për një plan veprimi mbarëkombëtar kundër homofobisë dhe transfobisë, një ligj për vetëvendosjen dhe përmirësime të ligjit federal kundër diskriminimit.
Burimi: Reuters |Përktheu dhe Përshtati: JOQ Albania
