Para pak ditësh u njoftua se 23-vjeçarja Brisilda Sadushi ka humbur jetën pasi i ishte nënshtruar një operacioni në spitalin e Vlorës. E reja e cila ishte nënë e dy fëmijëve të mitur kishte infeksion të përgjithshëm në gjak dhe tension të ulët dhe sapo hyri në operacion ndërroi jetë. Duke folur për "BW", nëna e 23-vjeçares tha se ajo ka patur një jetë vështirë dhe se burri me të cilin u martua që 17-vjeçe e dhunonte në mënyrë sistematike, ndërsa njëri prej fëmijëve të saj ishte me leucemi. Nëna e e 23-vjeçares tha se bashkëshorti e kishte braktisur mes katër rrugësh në skamje e sëmundje, derisa dha shpirt.
Telefonata e fundit me Brisildën?
Para dhjetë ditësh, nga sot i bie para dy javësh, më merr në telefon dhe më thotë “mami çova djalin e vogël për vizitë, i kanë dalë analizat keq”. I thashë të mos mërzitet, por më tha se ku do ta gjente kurajon. I thashë se do mundohemi të dyja, sikur dhe kanaçe të mbledhim. “O moj mami çfarë do bësh ti më parë”. I thashë që do t’i bëjmë të gjitha dhe do ta përballojmë. Kjo ishte. Më pas, marr në telefon, në fshatin ku kam qenë e martuar, ish-kunatën, i kam marrëdhëniet shumë të mira me ata, dhe iu luta të lajmërojë pak të atin e vajzës të më marrë në telefon. I thuaj të ndihmojë vajzën, të paktën për një muaj, sa të mbyll punën unë. Ajo më tha “në rregull” dhe më tha që do më kthente përgjigje. E mora unë, se nuk duroja dot, më tha që “më ka thënë mos më shqetëso më, ai film është mbyllur”. Pra, ai nuk donte ta ndihmonte vajzën, i kishte thënë kunatës që nuk ekziston më për mua ajo. Ish-bashkëshorti im ka qenë shkaktari i martesës së vajzës, pa më vënë në dijeni fare, në moshën 17-vjeçare të vajzës. Ne u ndamë më 2014, më 2017 ai martoi vajzën.
