Presidenti i Këshillit Evropian, Charles Michel, nëpërmjet një postimi në Facebook ka kërkuar nga kryeministri i Kosovës Albin Kurti dhe nga presidenti serb Aleksandër Vucic të deeskalojnë situatën dhe të tërhiqen mbrapa nga tensionet në veri.
Michel ka thënë se po qëndron në kontakte të ngushta me kreun e Bashkimit Evropian për Politikë të Jashtme dhe Siguri, Josep Borrel dhe i ka bërë thirrje Kosovës e Serbisë ta qetësojnë situatën.
Gjithashtu Michel ka bërë thirrje që të tërhiqen trupat e Forcave Speciale të policisë së Kosovës dhe barrikadat nga pikat kufitare 1 dhe 31 në Jarinjë dhe Bërnjak.
“Në kontakt të ngushtë me Josep Borrell. Koha që Serbia dhe Kosova, Aleksander Vucic dhe Albin Kurti të tërhiqen mbrapa dhe të deeskalojnë situatën, përfshirë edhe tërheqjen e Forcave Speciale dhe barrikadave dhe të vazhdojnë negociatatet sipas propozimeve të Emisarit të Lartë të BE’së Miroslav Lajcak”, ka shkruar Michel.
Reagimi i Michel vjen sot pas tensioneve të mëdha në veri të Kosovës ku në Zveçan e Zubin Potok pati sulme ndaj Qendrave të Regjistrimit dhe gjithashtu pasi avionë ushtarakë serbë u panë duke lëvizur mbi Jarinje e Bërnjak.
Kryeministri i Kosovës, Albin Kurti, në një konferencë për media ka thënë se Serbia po provokon konflikt ndërkombëtar e që gjithashtu mund të marrë përmasa rajonale me anë të veprimeve të tilla siç janë bllokimi i rrugëve dhe kërcënimet me mjete ushtarake tokësore e ajrore.
Ndërkohë, sot është mbajtur edhe mbledhja e Këshillit të Sigurisë Kombëtare të Kosovës por që asgjë nuk është thënë për media. Sipas raportimeve të fundit, situata në veri është e qetë, ndërsa protestuesit serbë vazhdojnë të qëndrojnë aty duke provokuar me këngë nacionaliste, policët specialë të Kosovës.