"Helikopterët e ushtrisë që u shfaqën në afërsi të pikës kufitare Kosovë-Serbi, nuk janë kërcënim për askënd, por një mesazh paralajmërues dhe parandalues për Albin Kurtin". Kështu ka deklaruar kryetari i të ashtuquajturit "Komision për Kosovën në Kuvendin e Serbisë", Milovan Drecun.
Sipas tij, ky paralajmërim është që Kurti të fillojnë de-përshkallëzimin e situatës dhe për të mos menduar për tensione dhe konflikte të reja me popullin serb, por për t’iu përkushtuar bisedimeve.
“Ky është mesazhi ynë i paqes. Nëse pala tjetër heq dorë nga një zgjidhje paqësore e problemit, ne do të zbatojmë të gjitha kapacitetet mbrojtëse që kemi,” tha Drecun në televizionin Tanjug.
Sipas tij, mesazhi i Serbisë është i qartë dhe është një mesazh paqeje.
Drecun theksoi se Serbia kërkon që Prishtina të ndalojë veprimet e dhunshme, të kthejë forcat speciale jashtë veriut të Kosovës dhe kërkon nga institucionet ndërkombëtare të pranishme në Kosovë që të realizojnë mandatin e tyre dhe të parandalojnë Prishtinën që të ndryshojë në mënyrë të njëanshme dhe të dhunshme situatën në terren.
“Përndryshe, nëse institucionet ndërkombëtare nuk duan ose nuk janë në gjendje të zbatojnë mandatin e tyre, i cili ka të bëjë me mbrojtjen e të gjithë atyre që jetojnë në Kosovë dhe populli serb është më i rrezikuar atje, atëherë ne do ta zbatojmë atë pjesë të mandatit, “tha ai.
Sipas tij, disa informacione tregojnë se një pjesë e bashkësisë ndërkombëtare e dinte se veprimet po përgatiteshin në pikat kufitare dhe nuk e parandaluan atë.
Ai theksoi se tani bashkësia ndërkombëtare në Kosovë, NATO dhe Prishtinë po analizojnë hapat e mundshëm të Beogradit për lëvizje të mundshme të mëtejshme nga Prishtina.
Ai deklaroi se Kurti tani është duke u konsultuar me bashkëpunëtorët e tij nëse do të prishin barrikadat dhe se nëse ai vendos ta bëjë këtë, kjo sigurisht që do të çojë në një konflikt me popullin serb, i cili nuk është i mirë.
"Është shumë e rëndësishme se si do të sillet Prishtina në ditët në vijim,” theksoi ai, duke përmendur 1 tetorin si një ditë tjetër të mundshme problematike.