Ditën e sotme kryebashkiaku i Pukës, Gjon Gjonaj njoftoi se të gjithë punonjësit duhet të jenë të vaksinuar ose në të kundërt do të kryejnë tampon çdo javë. Në këtë mënyrë bashkia Pukë bëhet e para në vend që merr një vendim të tillë kaq drastik për nënpunësit e shtetit. Më herët në dalje të tjera për mediat kryeministri Edi Rama dhe ministrja e Shëndetësisë Ogerta Manastirliu kanë deklaruar se vaksinimi masiv do të vijojë të përhapet edhe për kategori të tjera të qytetarëve.
Deri më tani në vendin tonë vaksinimi i mësuesve, pedagogëve, studentëve, mjekëve dhe stafit të spitaleve dhe shkollave është me detyrim. Ndërkohë para pak ditësh mjeku imunolog Genc Sulçebe tha se edhe vaksinimi i fëmijëve duhet të jetë me detyrim pasi sipas tij Delta është si virusi i lisë së dhenëve që është shumë ngjitës. Ndërsa edhe zv.ministrja e Shëndetësisë, Eugena Tomini ka njoftuar më herët se vaksinimi i punonjësve të shtetit do të jetë me detyrim për të parandaluar përhapjen e covidit dhe variantit Delta.
Kujtojmë se në muajin korrik u mor vendimi që muaji gusht do të jetë muaj i hapur vaksinimi për të gjitha grupmoshat për të nxitur sa më shumë këtë proces. Ndërsa në fund të gushtit ky vendim u shty sërish duke e bërë edhe shtatorin si muaj për vaksinimin masiv. Duket se ky muaj masiv vaksinimi nuk ka vetëm për qëllim vaksinimin e të gjithëve kush ka dëshirë, por 'njoftimin' se vaksinimi po bëhet me detyrim për të gjithë. Kjo pasi në muajin korrik e gusht nuk ishte përmendur asnjëherë vaksinimi i detyrueshëm për të gjithë, por duket se nën pretekstin e muajit masiv të vaksinimit qeveria të bëjë të detyrueshëm këtë proces. Në fund të muajit gusht, Rama njoftoi se vaksinimi i detyrueshëm do të jetë për studentët dhe pedagogët duke shtuar se ata që nuk pranojnë të bëjnë vaksinën do të mbeten jashtë auditoreve.
Ndërkohë sot u njoftua nga kryebashkiaku i Pukës se vaksinimi do të jetë i detyrueshëm edhe për punonjësit e shtetit. Duke kujtuar një deklaratë të ministres Manastirliu në lidhje me muajin e hapur të vaksinimit mund të bëjmë një lidhje logjike se edhe tetori që do të jetë për vaksinim masiv do të jetë i detyrueshëm për ndonjë kategori tjetër qyetarësh, për të mos thënë për të gjithë.