Ditën e djeshme Kombëtarja Shqiptare humbi thellë me 4-1 kundrejt Polonisë, ndeshje e vlefshme për eliminatoret e Botërorit Katar 2022. Rezultati ishte zhgënjyes për mijëra tifozë kuqezi dhe kjo ka bërë që të “shfryhen” mbi mbrojtësin e Kombëtares Ardian Ismajli. Përmes një postimi në “Facebook”, i ati i tij Ilmi Ismajli ka denoncuar mesazhet fyese ndaj të birit dhe familjes pas përfundimit të ndeshjes. Gjithashtu ai shkruan se qëkur djali i tij vendosi të luajë për Shqipërinë, ka patur vazhdimisht mesazhe fyese në drejtim të tij nga persona të fuqishëm, por nuk përmendi emra.
Postimi i plotë i Ilmi Ismajlit:
Të dashur vëllezër, ne si familje dhe në veçanti Ardiani prej momentit që kemi zgjedhur Kombëtaren Shqiptare kemi kaluar periudha të vështira nga kërcënimet, fyerjet dhe etiketime më të ulëta që i bëhen një lojtari dhe familjes së tij dhe ende vazhdojnë. Unë besoj që kjo është e porositur edhe nga njerëz të fuqishëm. Ne nuk kemi zgjedhë të luajmë për një shtet armik, por për nënën Shqipëri e cila është e të gjithëve ashtu siç është edhe Kosova dhe të gjitha trojet Shqiptare. Këto veprime prej më të ulëtëve neve vetëm sa na forcojnë, për Ardianin është edhe një motiv shtesë që të punoj e të arrijë majat e futbollit botëror. Ju falënderoj të gjithëve që keni qenë pranë nesh dhe na keni përkrahur që të jemi më të fortë. Fotoja e fundit nuk ka koment. Përpara Ardian, përpara djem shqiptarë! Suksesi do të arrijë shumë shpejt vetëm të bashkuar.
