Tenderat shqiptarë vazhdojnë të na çudisin përditë e më shumë. Ata bëhen në një mënyrë të tillë me dyshime kaq të qarta sa krijohet përshtypja se askush nuk e vret mendjen që të paktën të mbulojë “gjurmët” sa për sy e faqe. Duket se askujt nuk i bëhet vonë dhe tenderat me probleme vazhdojnë të jepen çdo ditë. Njëri prej tenderave që ngjall dyshime është edhe ky që do t’ju paraqesim në vijim.
Kjo procdurë prokurimi ka të bëjë më Bashkinë e Vaut të Dejës, drejtuar nga kryetari Mark Babani. Bëhet fjalë për një tender me objekt “Shërbim pastrimi për vitin 2021,2022,2023” me fond limit 62,882,080 lekë të reja pa TVSH. Le të dalim tek pikat e dyshimta. Së pari vihet re konkurrenca është tepër e cunguar pasi kanë marrë pjesë vetëm 2 konkurrentë. Së dyti, duke parë vlerat e ofertave të dy konkurrentëve shikohet se për habi ka fituar konkurrenti që ka ofruar vlerën më të lartë.
Nuk bëhet fjalë për ndonjë diferencë të vogël por për rreth 62 milionë lekë të vjetra me TVSH. Një shifër e tillë sigurisht nuk është e tillë sa për të mos u marrë në konsideratë, pasi fare mirë këto para mund të përdoreshin për aktivitete të tjera në shërbim të komunitetit. Së treti, vihet re se për habi firma që ofroi rreth 62 milionë lekë të vjetra më pak, tërhiqet pa pritur nga gara duke bërë që fitues të shpallet garuesi i vetëm.
Bëhet fjalë për bashkimin e kompanive “LEKA-2007” me pronar Luigj Leka dhe “NDERTUESI 2014” në pronësi të Sandër Shpati dhe Gjokë Ograja. Këta rezulton të kenë ofruar vlerën prej 61.813.731 lekë të reja pa TVSH ose rreth 750 milionë lekë të vjetra me TVSH. Së fundmi shikohet gjithashtu se kjo vlerë fituese është thuajse identike më fondin limit të tenderit, përkatësisht sa 98.3% e tij. Të gjitha sa më sipër ngjallin dyshime jo të vogla se fituesi mund të ketë qenë i paracaktuar.