Kompanitë më të mëdha të Shëndetësisë, pikërisht ato që kanë përfituar më shumë nga Paratë Publike, të cilat janë futur drejt e në xhepin e oligarkëve të kësaj fushe, rezulton se kanë lidhje, sigurisht jo në letra, me politikanë të fuqishëm të vendit.
Një prej këtyre kompanive është pa asnjë diskutim MEGAPHARMA, me lidhje fisnore me nënkryetarin e LSI, Petrit Vasilin, fiktivisht me letra në emër të kushëririt të tij. 50% të aksioneve të kësaj kompanie kanë qenë në pronësi të Rasim Hamzarajt, djalit të dajës së Vasilit, i cili ia ka shitur të shoqes për 60.000 lekë pas akuzave në media. Gjithsesi biznesi qëndron brenda familjes dhe vazhdon të përfitojë nga Buxheti i Shtetit, konkretisht nga Rilindja.
Pak muaj më parë bëri bujë lajmi se MEGAPHARMA furnizonte me vaksinën e gripit vetëm rrjetin e Orange Farmacies, 75% të aksioneve të së cilës janë nën zotërim të MEGAPHARMAS, duke monopolizuar kështu prodhimin dhe distribucionin e vaksinës së gripit, të cilën e shiste si ekskluzive vetëm në pikat e saj duke shkelur parimin e konkurrencës në treg.
Rezulton se MEGAPHARMA mban vendin e tretë në listën e kompanive të kësaj fushe përsa i përket numrit të tenderave të fituar në Shëndetësi, plot 1026 kontrata publike dhe vendin e 5-të për vlerën më të lartë të përfituar me mbi 8.4 miliard lekë pa tvsh.
Me datë 26,30 dhe 31 Mars kompania jo në letra e Tit Vasilit, ka përfituar 3 tendera me vlerë mbi 627 milionë lekë pa tvsh.
Nëse do t’i analizojmë shkurt të tre tenderat, janë dhënë i pari i datës 12 Mars nga QSUT i drejtuar nga Enkel Joti dhe dy të tjerët nga Shefqet Ndroqi i drejtuar nga Perlat Kapisyzi, institucione nën varësi të ministrisë së Shëndetësisë që drejtohet nga Ogerta Manastirliu
Në tenderin e parë, operatori tjetër konkurrues FlorFarma nuk ka dhënë ofertë ekonomike duke e shënuar këtë procedurë prokurimi si REDLAG për mungesë konkurrence.
E njëjta skemë ndodh në tenderin e datës 30 Mars ku po prapë operator ekonomik konkurrues është FlorFarma i Todhajve, por këtë herë jep ofertë mbi fondin limit duke shpallur automatikisht fituese Megapharmën.
Tenderi i tretë të datës 31 Mars, është shënuar po ashtu me flamur të kuq për mungesë konkurrence.
Lidhja e politikanëve opozitarë me qeverinë faktohet jo vetëm jashtë fushatës politike në dreka e darka të përbashkëta, por haptazi në procedurat e tenderimeve publike ku plasin qokat për kompanitë e opozitës së bashkuar. Ky që ju sollëm sot është rasti konkret i faktuar ndër më bazikët që mund të gjeni në këtë fushë ku paratë e taksapaguesve shqiptarë derdhen lumë.
*Shënim I: Pjesët e nënvizuara në tekst me ngjyrë të kuqe, janë hiperlinke që të drejtojnë në faqe të tjera, informacione shtesë, shpjeguese në lidhje me lajmin*
© 2021 JOQ ALBANIA Të gjitha të drejtat e rezervuara
Ky artikull është ekskluziv i JOQ ALBANIA, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar JOQ ALBANIA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
