Inxhinjerja e njohur Luljeta Bozo, ishte një emër që befasoi jo pak, pasi kryeministri Edi Rama tha se ajo do të ishte kandidate për deputete e Partisë Socialiste. E ftuar në emisionin “Dola te Ola”, ajo pranoi se ftesa i kishte ardhur e papritur dhe se në fillim kishte patur një hezitim, ndërsa shtoi se ishte dhe dëshira e njerëzve që ajo t’i përfaqësojë. Ndër të tjera, ajo theksoi se pret që “jeta parlamentare” të jetë e vështirë, por shtoi se kjo nuk e tremb.
Ajo është shprehur se:
Thashë po. Në fakt erdhi një çik si i papritur. S’më kishte shkuar në mendje të isha kandidate në Kuvend. Kisha një si detyrim qytetar pas tërmetit, kam pasur një detyrim dhe falënderim nga shumë njerëz që më uronin jo vetëm falënderimin për qetësinë gjatë tërmetit, uronin të kenë njerëz si ju që të na drejtojnë. Është dëshirë e gjerë e njerëzve që s’i njoh, dhe vlerësimi shumë i madh. E pranova me njëfarë hezitimi, s’jam mësuar me këto gjëra.
Mendoj se jeta do vazhdojë me të njëjtin ritëm. Do jenë disa detyra të reja, unë punoj gjithë jetën. S’kam bërë ndonjëherë jetë parlamentare, s’më tremb. Do jetë angazhimi dhe përgjegjësia më e madhe. Në parlament s’do flasësh kodra pas bregut. Por për një grup të gjerë, probleme të njerëzve. Të shikoj cilat janë drejtimet në të cilat do zhvillohet vendi se ajo është detyra e qeverisë. Themi për zhvillim brenda mandatit dhe njëçik më larg.Të hartohen ato ligjet që njerëzit të punojnë dhe jetojnë në Shqipëri. Leku për mua është i fundit.