Mjeku Erion Dasho ka denoncuar një tjetër skandal në lidhje me testet e shpejta të Covid-19. Sipas mjekut, testet e shpejta të Covidit që po përdoren këtë muaj janë të prodhuara në Kinë. Me anë të një postimi në rrjetet sociale, mjeku vëren se është pikërisht kjo arsyeja përse personat e infektuar që kryejnë këtë test rezultojnë negativë dhe përse numri i personave të infektuar ka rënë ditët e fundit.
Postimi i plotë:
HABERET E BORATIT: BORATI BLE TESTE KINEZE
Pas një muaji mungesë më në fund testet e shpejta të COVID-it erdhën. Vetëm se ka një problem “të vogël”. Në vend të testeve Roche dhe Abbott që përdoreshin deri në shkurt, testet e marsit janë markë “Made in China”. Dallimi është i dukshëm dhe me efekt të menjëhershëm! Nëse me testet cilësore që ishin në përdorim deri muajin që kaloi shkalla e pozitivitetit ishte rreth 60-70% (pasi testohen pacientë të dyshuar për COVID) me testet kineze pozitiviteti nuk e kalon 10-15%. Pacientë qartazi të prekur nga COVID, me këto teste figurojnë “të shëndetshëm”! Kjo mund të jetë edhe arsyeja kryesore se përse numri i personave që testojnë pozitivë ditët e fundit ka rënë. Për momentin “ulet” numri i rasteve, pas dy javësh “ulet” edhe numri i vdekjeve dhe megafonët e prishur dhe puthadorët e Boratit mund të dalin në media për të konfirmuar “fitoren” mbi virusin. Poshtë shënim: qytetarët të mos merakosen për fitimet e firmës që i kanë sjellë këto teste. Ndonëse çmimi i tregut i testeve kineze është 50 cent deri 1 dollar, këto teste u faturohen qendrave shëndetësore me 1 mijë lekë të rinj për test. Norma e fitimit rreth 1 mijë deri 2 mijë për qind!