Q.Seiti është 17-vjeçari i cili humbi jetën ditën e djeshme si pasojë e COVID-19. Vdekja e tij u shënua si humbja me moshën më të rej prej COVID-19 në Shqipëri. Lidhur me të riun ka folur edhe miku i tij, Xhuliano, i cili ndihet i shokuar nga kjo humbje tragjike.
Në një komunikim për Shqipëria Live ai është shprehur se ende duket sikur është në ëndërr, teksa tregon momentin kur ka marrë vesh lajmin e kobshëm. Xhuliano u shpreh se ka folur me 17-vjeçarin vetëm 10 ditë më parë, ku kanë diskutuar për të ardhmen e tyre, pasi ëndrra e të ndjerit ishte të bëhej një kuzhinier i suksesshëm.
Xhuliano është shprehur:
Isha në shkollë, kur në 5-minutësh na erdhi një lajm i pakonfirmuar. Ne mendonim se nuk ishte i vërtetë. Ishte mesazh se Qamili ka ndërruar jetë. Nuk na binte në mendje që një djalë 17-vjeçar të ndërronte jetë. Para 10-ditësh kemi folur me të, e kemi folur për të ardhmen tonë. Ai kishte pasion kuzhinën. Madje punonte kur kishte kohë të lirë. E donte të ardhmen. Të arrij një gjë të mirë nga vetja. Donte ta bënte familjen e tij krenar. Jam i shokuar , më duket sikur jam akoma në ëndërr. Tani babai i tij është në intubim, urojmë të shërohet sa më shpejt. Kur flisnim për virusin, ai kishte merak vetëm nënën e babanë, nuk e mendonte se do të shkonin gjërat kështu. Ka patur një vëlla dhe motër më të madh, që janë në gjendje të mirë shëndetësore.