Ditën e djeshme dy vajzat e vëllait të ish-deputetit të PD-së Vili Minarolli, deklaruan se babai i tyre Rifat Lalo ( Minarolli) humbi jetën tek Covid 1 për shkak se nuk mori trajtimin e duhur në spital. Madje babai i tyre iu kishte kërkuar disa herë që ta nxirrnin jashtë para se të vdiste. Në lidhje me rastin ka reaguar edhe vetë kryeministri Rama, i cili tha se në deklaratat e dy vajzave nuk kishte asnjë të vërtetë dhe se këto ishin thjesht "deklarata dhimbjeje dhe partie". Gjithashtu Rama trajtoi edhe rastin e një gruaje që denoncoi se babait të saj i ishin vjedhur sendet personale, të cilat iu kthyen më pas.
Ndërkohë dy vajzat e të ndjerit Rifat Lalo kanë folur ditën e sotme në një intervistë ekskluzive për JOQ Albania. Ato shprehen se e kanë dërguar të atin në Urgjencën Infektive për një shërbim më profesional. Por nga momenti që ato e kanë dorëzuar në spital, nuk kanë patur asnjë transparencë mbi ecurinë e ngjarjeve. Në një bisedë telefonike që kanë patur me të, vajzat rrëfejnë se i ati i ka thënë se kishte shumë ftohtë dhe se e kishin lënë në një stol pa i bërë asnjë shërbim. Sipas tyre, mjekët i kanë thënë se babai ishte shumë rëndë, në gradën e tretë Covid, por të kundërtën u kishte pohuar vetë i ndjeri, duke i thënë se nuk e kanë prekur me dorë.
Vajzat shtojnë se janë gjendur para dy altenativave për të atin, ta mbanin të shtruar në spital, ose ta merrnin në shtëpi. Por sipas tyre ky ishte një vendim që duhej marrë nga vetë departamenti dhe personeli mjekësor, pasi u kishin besuar tërësisht atyre. Vajzat shprehen se do ta ndjekin çështjen deri në fund dhe do të kërkojnë të gjitha procedurat mjekësore që janë kryer, që nga analizat, skaneri, rezultatet dhe të gjithë dosjen e plotë.