Nëse e keni vënë re, Ergys Verdho ka nxituar muajt e fundit të shpërndajë miliarda nga të katër anët. Duket se befas të gjitha rrugët në vend kanë nevojë të rregullohen dhe Ergysi është i gatshëm në çdo moment. Një shpjegim i arsyeshëm mund të jetë fakti se së shpejti vijnë zgjedhjet dhe Rilindja ka nevojë të japë tendera poshtë e përpjetë në mënyrë që të kënaqen të gjithë ata që duhet të kënaqen.
Por me sa duket, këtu hyn edhe kushëriri i ish-kryetarit demokrat të Bashkisë Pogradec, Eduard Kapri. Bëhet fjalë për firmën “REJ” në pronësi të Luan Kaprit, kushëririt të Eduard Kaprit. Kjo firmë është shpallur fituese në tenderin me numër reference REF-65744-07-16-2020 dhe me objekt “Loti 9 : “Mirëmbajtje me performancë K/Zëmblak – Liqenas – Dog. Goricë, Libonik – Rrëmbec – Plasë ”, për vlerën prej 152,997,953 lekësh të reja pa TVSH ose rreth 1.8 miliardë lekë të vjetra me TVSH.
Në këtë tender kanë marrë pjesë vetëm 2 firma, nga të cilat fituese është shpallur firma “REJ” ndonëse firma tjetër kishte ofruar një ofertë më të ulët. Nga ana tjetër vihet re se vlera fituese është thuajse identike me fondin limit, përkatësisht sa 90% e tij. Me pak fjalë, Ergys Verdho duket se “i ka falur” plot 1.8 miliardë kushëririt të ish-kryetarit demokrat.
