Rastet ku një qytetar paguan për një shërbim internet, por ky i fundit vjen ‘copë-copë’ janë të shpeshta në Shqipëri, teksa një gjë e tillë i ka ndodhur një qytetari. Pranë redaksisë së “JOQ Albania” ka mbërritur një mesazh, ku një qytetar ankohet lidhur me shërbimin e internetit që ofron kompania “ALBtelecom”. Në mesazhin e tij, qytetari shprehet se ka lidhur një kontratë me këtë kompani ku do të marrë shërbimin internet me një shpejtësi prej 60 Mbps, mirëpo ky shërbim i shkon me një shpejtësi prej 28 Mbps, ose më e keqja sipas tij nuk i shkon fare.
Qytetari shprehet se ka kontaktuar me punonjësit e kompanisë, por që këta të fundit nuk e shohin si problem, teksa argumentohen se shpejtësia duhet të matet me kabull dhe të mos lidhet pajisje tjetër në internet. Qytetari i cili ankohet ndaj kompanisë e sheh këtë problem si një mashtrim që ka mbi 20 vite që ekziston, ndërsa në fund ndihet edhe i zhgënjyer duke marrë parasysh shërbimin që i ofron kompania edhe pse paguan për këtë shërbim.
