Rrugët e Durrësit ende në rehabilitim/ Qytetari: I bëjnë e pas 1 viti i prishin prapë, pse t’i paguajmë ne?

Rehabilitimi i dy akseve rrugore të qytetit të Durrësit, respektivisht i rrugës “Dëshmorët” dhe “Egnatia Loti II”, kanë nisur me një fond që kap vlerën rreth 190 milionë lekësh të reja. Punimet kanë nisur që në muajin mars të vitit të kaluar dhe mendohej të përfundonin në gusht të po atij viti. Por, punimet e tejzgjatura në kohë dhe që duken ende shumë larg të përfunduarit kanë krijuar shumë problematika në qytet që kanë të bëjnë pikërisht me trafikun e rënduar që vjen nga ngushtimi i rrugës për të zgjeruar trotuaret.

Një qytetar është shprehur se:

Nuk ke ku ecën. Kudo ka trafik dhe 2 orë në trafik do të thotë një shpenzim i çuar dëm për ne.

Vlen të theksohet se ajo që mbetet më tepër shqetësuese është ngushtimi i rrugës dhe fakti se madhësia e rotondës nuk është në proporcion me të. Qytetarët i shohin me skeptizëm këto projekte duke deklaruar se ka ndodhur jo pak herë që investimet e bëra të rezultojnë të pavlera.

Një qytetar tjetër shprehet se:

Kemi lëvizur në shumë vende, por s’kemi parë të ngushtohen rrugët e të zgjerohen trotuaret. Këtu mjaftojnë pak minuta e krijohet trafik, do ta kemi shumë të vështirë. S’po dijmë ku të ecim. Bëjnë rrugë e pastaj pas 1 viti përmbytet e e prishin prapë. Pse t’i paguaj unë gabimet e tyre?.

Ndërkohë, Ardian Muka drejtuesi i departamentit të zhvillimit urban dhe infrastrukturës, është shprehur për faxnews se këto punime ishin një “gafë” e madhe e qeverisë vendore pa kryetar, pasi sipas tij pushteti vendor ishte në duart e kryeministrit.