Mbrëmja e djeshme ka qenë katastrofale për skuadrën e Romës. Verdhekuqtë u eliminuan nga Kupa e Italisë, pasi u mposhtën nga Spezia me rezultatin 4-2, por tashmë do e humbin ndeshjen edhe në tavolinë me rezultatin 3-0. Trajneri Fonseka bëri 6 zëvendësime, ndërkohë që vetëm 5 lejohen. Rregulli thotë se mund t’i bësh 6 zëvendësime, por vetëm nëse 5 i ke bërë gjatë kohës së rregullt dhe një mund ta bësh në shtesë.
Ndërkohë që trajneri i Romës, në shtesë hodhi në fushë 2 lojtarë, portierin Fucato dhe mbrojtësin Ibanjez. Për këtë humbja në tavolinë është e pashmangshme për verdhekuqtë. Kjo nuk është hera e parë për klubin kryeqytetas, pasi kanë bërë një tjetër gafë që në ndeshjen e parë të sezonit, kur aktivizuan ndaj Veronës, Amadu Diavara, i cili nuk ishte i përfshirë në listën zyrtare të lojtarëve dhe humbën ndeshjen në tavolinë.