Jepi Tomi! Kjo shprehje e cila filloi të përdorej si me shaka në tenderat e organizuar nga Tomi Frashëri i AKEP, duket se po zë gjithmonë e më tepër një vend të rëndësishëm për sa kohë ka lekë në mes. Rezulton se Tomi “i jepka” jo mirë, por shkëlqyeshëm! Kur leku shfaqet në horizont, Tomin e AKEP nuk ka asgjë që ta ndalë! Nuk po e egzagjerojmë aspak.
Kësaj rradhe AKEP ka organizuar një tjetër tender shumë-milionësh për të vënë duart në kokë. Bëhet fjalë për shifrën “e çmendur” prej rreth 200 milionë lekë të vjetra me TVSH, që Tomi do t’ia japë Grigor Jotit të grupit INFOSOFT. Të gjitha këto para do të jepen thjesht për mirëmbajtje. Bëhet fjalë për tenderin me numër reference REF-73938-10-05-2020 dhe me objekt “Implementim Disaster Recovery Site të CRDB”.
E gjeni dot se cilët janë konkurruesit në tender? Jo? Hë tani përpiquni pak. Bëjmë shaka, se në fakt nuk ka çfarë të gjesh. Konkurruesi i vetëm në garë, është vetëm Grigor Joti… Pra zotëria i bie që ka garuar kundra vetes dhe pasi “ka rrahur” veten paq, është shpallur fitues. Meme e gatshme apo jo? Grigor Joti nëpërmjet dy kompanive që zotërohen prej tij (“Infosoft System” dhe “ikubINFO”), ka fituar me vlerën e paraqitur prej 16,476,315 lekësh të reja pa TVSH, e cila është sa 94.96% e fondit limit të tenderit në fjalë.
Fakti që ka garuar i vetëm dhe që ka ofruar thujase vlerë identike me fondin limit e bën Grigor Jotin fitues të paracaktuar dhe tenderin thjesht një farsë. Si duket Grigori dhe Tomi do të ndajnë së bashku një pjesë të mirë të këtyre milionave. Dhe siç e dini, neve s’na mbetet gjë tjetër veçse të themi: Jepi Tomi!