Vidh sot, vidh nesër, se diçka do të mbetet. Jo për ata që vjedhin apo familjarët. E kemi fjalën për brezin e shtatë. E ekzagjeruar? Jo, aspak. Madje ndoshta kaq është pak. Themi kështu sepse duke parë mënyrën se si abuzohet e vidhet me tenderat, është për të vënë duart në kokë. Kohët e fundit vjedhjet janë shtuar aq shumë saqë edhe tenderat abuzues bëhen hapur fare, pa u përpjekur aspak që të paktën të fshijnë ndonjë gjurmë.
Një ndër rastet më tipike është ky që po ju paraqesim në vijim. Bëhet fjalë për një tender të organizuar nga SH.A Ujesjelles Kanalizime Tiranë, e cila varet kryekëput nga vetë lordi i parave të Tiranës, lali Leku. Rezulton se ky institucion i drejtuar nga Redi Molla, ka organizuar një tender me numër reference REF-79997-11-25-2020 dhe me objekt “Shërbim Fotokopje me të tretët”. Fondi limit i këtij tenderi është 21,978,333 lekë të reja pa TVSH.
Ndoshta do t’ju duket meme e gatshme, por në fakt është e vërtetë. Rezulton se institucioni në varësi të lali Lekut planifikon të harxhojë plot 260 milionë lekë të vjetra me TVSH që të bëjë fotokopje. Nuk është aspak shaka. Është planifikuar që një person i tretë të bëjë fotokopje për këtë institucion. Pyetja më e thjeshtë e mundshme që edhe një fëmijë i klasës së pestë fillore do të bënte, është: Po mirë, nuk kanë fotokopje nëpër zyra këta punëtorë të UKT? Nuk mund t’i fotokopjojnë vetë dokumentat? Sigurisht që po, por si do të vjedhë pastaj Redi Molla me lali Lekun?
