1 MILIARD LEKË pa TVSH përfitoi sërish në kurriz të shqiptarëve oligarku Artur Kadare pak ditë më parë. Biznesmeni i Shëndetësisë me veprimtari në fushën “import – eksport, tregtim me shumicë-pakicë e mallrave, materialeve dhe pajisjeve elektromjekësore, barnave, artikujve të ndryshëm industriale, etj shërbime të tjera të lejuara nga ligji” do të furnizojë QSUT për 2 vitet e ardhshme me materiale mjekësore për Shërbimin e Kardiokirurgjisë.
Kështu Artur Kadareja supozohet se është fituesi i lotit të parë të tenderit të shpallur nga Spitali Universitar “Nënë Tereza” i cili disponon edhe 3 lote të tjera për klientët e qeverisë dhe miqtë e ministreshës Ogerta Manastirliu, në një garë pa konkurrentë, tender me Procedurë të Hapur.
Ashtu siç ka ndodhur edhe në tenderat e mëparshëm të fituar nga BIOMETRIC ALBANIA e Kadaresë, edhe këtë herë ofertuesit e tjerë , ELTIAN 2009 dhe OES Distrimed, nuk kanë paraqitur dokumentacion, duke i hapur kështu rrugën drejt një tjetër projekti një prej oligarkëve të preferuar të shëndetësisë.
Nga 245 kontrata të fituara nga të gjitha spitalet e vendit, Artur Kadare ka vjelur 13 MILIARD LEKË pa TVSH duke u shndërruar kështu në një prej klientëve më të favorizuar të Ministrisë së Shëndetësisë.
Janë plot 113 tendera publikë me vlerë mbi 100 milionë lekë të fituara nga Artur Kadare, në shkelje të hapur të ligjit nga ku vërehet se më i fundit u fitua një muaj më parë.
Një tjetër detaj jo i parëndësishëm është vlera me të cilën Kadareja na shërben ushqimin në spitale, të cilin të gjithë hallexhinjtë e dinë si serviret. Plot 7 MILIARD LEKË pa TVSH, në shkelje të ligjit.
Kompania me pronar të vetëm Artur Kadarenë shpesh herë ka bashkëpunuar edhe me bashkëoligarkët e tjerë të shëndetësisë. Rradhisim këtu MONTAL-in e Skënder Lufit dhe ALMEDICAL e Llambro Sulotit dhe Oltion Bellos.
Megjithatë nga 245 tendera, 113 i ka plotësisht në shkelje të ligjit pasi në të gjitha këto kanë qenë pa garë, pasi nuk ka pasur asnjë konkurent tjetër për prokurimet e fituara.
