Siç ju kemi përmendur shpesh herë, njëri ndër kontraktorët më të mëdhenj të “Rilindjes Urbane” është edhe Paqsor Buzi. Ky person nëpërmjet kompanisë së tij G.P.G. COMPANY rezulton se ka fituar nga institucionet shtetërore një “det” me tendera. Përkatësisht vetëm në 8 vitet e fundit Paqsor Buzi ka fituar rreth 93 milionë euro nga tenderat.
Por përtej gjithë këtyre milionave që ai ka “kullufitur” përgjatë viteve, gjithashtu ka patur edhe probleme me policinë. Kështu në muajin shtator të vitit 2019 ai u arrestua nga policia së bashku më një grup biznesmenësh. Ata u dyshuan si të përfshirë në një skemë gjigante mashtrimi ndaj shtetit. Bëhej fjalë për mashtrim nëpërmjet tatimit mbi Vlerën e Shtuar, TVSH. Akazuat e ngritura ndaj tyre ishin për “krijim të skemave mashtruese me TVSH”, “falsifikimit” dhe “fshehjes së të ardhurave”. Sipas njoftimeve të policisë së asaj kohe, dëmi i shkaktuar prej tyre ndaj shtetit kapte shifrat e rreth 26 milionë eurove.
Megjithatë duket se Paqsor Buzi dhe kompania e tij vazhdojnë të marrin përsëri tendera në nivele të frikshme. Tenderi më i fundit është ai me numër reference REF-69130-08-19-2020 dhe me objekt “Riveshje aksi rrugor Çermë – Divjakë si dhe degëzimet për në fshatrat: Grabian, Cerme Shkumbin – Bishçukas, Dushkecan – Hallvaxhias – Germenj i Madh”. Autoriteti kontraktues ka qenë Fondi Shqiptar i Zhvillimit i drejtuar nga Dritan Agolli.
Rezulton se në këtë garë kanë marrë pjesë 19 garues, dhe fitues është shpallur kompania G.P.G. COMPANY sh.p.k. me vlerën e ofruar prej 183,106,947 lekësh të reja ose rreth 2.2 miliardë lekë të vjetra me TVSH. Vihet re se një kompani tjetër ka ofruar një vlerë bindshëm më të ulët, afërsisht rreth 85 milionë lekë të vjetra me TVSH më pak se firma e Paqsor Buzit. E megjithatë, kjo firmë është skualifikuar me pretekstin që zakonisht përdoret në këto raste se nuk përmbushte njërin nga kriteret, duke bërë që Paqsor Buzi të shndërrohet në një “ari” të vërtetë të tenderave të Rilindjes.