Prej 11 muajsh AKEP ka bllokuar domainin www.joqalbania.al dhe arkivin e saj. Ndërkohë prej disa ditësh kemi bërë publike përgjimet që policia e shtetit bënte gjatë tërmetit të nëntorit, me qëllim identifikimin e përhapësve të lajmeve të rreme dhe panikut në popull. Në lidhje me këtë po flet edhe avokati Altin Goxhaj, i cili bën thirrje për protestë ditën e nesërme përballë AKEP në orën 16:00. Qëllimi është reagimi kundër censurës dhe përgjimeve online. Ai i është drejtuar gjithashtu me një peticion online institucioneve kombëtare dhe ndërkombëtare të të drejtave të njeriut për lirinë e shprehjes. Gjatë një lidhjeje direkte me JOQ Albania, Altin Goxhaj foli në lidhje me publikimin e përgjimeve nga Policia e Shtetit, ku kjo e fundit ruante komentusit, përfshirë edhe atë vetë.
Goxhaj theksoi faktin se AKEP ka bllokuar domainin www.joqalbania.al dhe giithë serverin. Bllokimi ka ardhur pa asnjë ligj dhe vendim të posaçëm gjykate. Ndërkohë i gjithë aksioni i ruajtjes dhe mbledhjes së informacionit është bërë nëpërmjet një profili fake, me emrin "Landa", që në fakt rezulton të jetë një punonjëse e policisë e quajtur Gjenovefa Budo. Avokati u shpreh se është skandalizuar në momentin kur ka parë dosjen e përgjimeve të policisë, në një procesverbal prej 30 faqesh. Gjithashtu sipas tij, kjo është e jashtëligjshme pasi përgjimi i personave mund të bëhet vetëm në rast kur dyshohen për aktivitete kriminale. Denoncimi i Goxhajt përmbledh një thirrje drejtuar ndërkombëtarëve, në lidhje me censurën që AKEP-i dhe Policia po ushtron ndaj mediave online.