Daja e Eva Dumanit, Xhetan Ndregjoni, ka zbuluar detaje të reja rrëqethëse nga operacioni i shpëtimit të fëmijëve shqiptarë nga kampi i Al-Hol. Ai ka dekalruar se Eva bëri një zgjedhje të vështirë mes vetes dhe vëllait të saj Endri dhe vendosi të shpëtonte vëllanë. Shkak për këtë sakrificë ishte gjendja e rëndë e tij, pasi nëse do të qëndronte edhe për ca kohë në kamp, me shumë mundësi do të humbte jetën.
Daja i Evës tha:
Është shumë e rëndë dhe shumë e rrezikshme të thuhet që Eva nuk ka pranuar të vijë. Ne pamë sekuencat e kampit. A kuptoni se çfarë bëhet atje? Atje është një katrahurë e paparë. Shihni pamjet dhe thoni si duhet të mendojnë ata njerëz. Nuk është shumë kollaj, se jam përpjekur 7 vjet rresht. Nuk kam lënë njeri pa kontaktuar. Dëshira ime për ta marrë ka qenë e madhe, por garancia ishte e vogël. Ajo ka pasur frikë që të kthehej, por ndoshta ka pasur edhe presion brenda kampit. Ajo ka bërë një zgjedhje mes vetes dhe vëllait. Solli vëllain, se ishte në gjendje shëndetësore shumë të ligë, shumë të rënduar. Nëse Endri do kalonte dhe një muaj në atë kamp, nuk do të ishte më.