Haxhi Robin Krasniqi është kampioni i ri i botës në peshat e mesme, sa i përket kategorive WBA dhe IBO. Boksieri shqiptar shkroi historinë, teksa është bërë i pari shqiptar që arrin të shpallet kampion bote në boksin profesionist. Krasniqi triumfoi ndaj gjermanit Dominik Bozel, duke fituar me nokaut në raundin e tretë.
Ndonëse Krasniqi përfaqëson Gjermaninë, përsëri ai u fut në ring me një këngë shqiptare në sfond. “Kuqezi je ti”, ishte kënga që shoqëronte atë gjatë futjes në ring. Duket se Krasniqi e ka shumë të qartë në mendjen e tij prejardhjen, duke ditur edhe vështirësitë që ka kaluar për të mbërritur deri këtu. Megjithatë, ai nuk është ndalur me kaq, teksa pas triumfit madhështor, është mbledhur me miqtë e tij, duke festuar më këngë patriotike. Shqiptari nuk ka nguruar të këndojë edhe vetë në praninë e një çiftelie.
