Mourinho i kërkon ndihmë futbollistit maqedonas për të mundur ekipin shqiptar

Tottenhami ka mbërritur dje në Shkup, aty ku sot në mbrëmje do të zhvillojë ndeshjen e raundit të tretë eliminator kundër klubit shqiptar, Shkëndija Tetovë. Trajneri i londinezëve, Jose Mourinho, ka thënë se ka marrë informacione rreth ekipit të Shkëndijës nga ish-lojtari i tij te Interi, maqedonasi Goran Pandev. Pandev ka një ekip të tijin në futbollin maqedonas dhe e njeh mirë Shkëndijen. Sipas ‘Special One’, Shkëndija është në nivel të skuadrës bullgare, Lokomotiva Plovdiv, me të cilën Tottenhami luajti në raundin e dytë të Ligës së Evropës, ku në fund fituan me rezultat 2-1.

Portugezi u shpreh:

I kemi analizuar, kishim një analist. Unë kam telefonuar edhe ish-lojtarin tim, Pandevin, pasi është pronar i ekipit që luajti së fundmi me Shkëndijën. E njoh stadiumin, kam luajtur në atë stadium finalen e Superkupës së Evropës. Do të thoja se është në nivel të ngjashëm të kundërshtarit bullgar (Lokomotiva Plovdiv). Ne jemi më të mirë, por duhet të shënojmë gola që të jemi më të mirë se ata. Në Plovdiv të gjithë e dimë se nuk bëmë një ndeshje të keqe, pasi e morrëm lehtë. Ky gabim nuk do përsëritet sërish.