Çifti homoseksual në Tiranë: Ishte dashuri me shikim të parë

Tashmë termi LGBT njihet gjerësisht në botë, kultura të ndryshme dhe mund të përdorim terma të tjerë për të përshkruar njerëzit që kanë marrëdhënie me persona të të njëjtit seks. Por në Shqipëri të jesh pjesë e këtij komuniteti, je totalisht i masakruar. Paragjykimet, ofendimet, sharjet, nuk do mbarojnë kurrë. Renaldo Bano është 22 vjeç dhe jeton në Tiranë. Ai është njohur me Kevan Hudson, një 26-vjeçar nga SHBA, që jeton gjithashtu në Tiranë dhe punon si mësues anglishtjeje. Çifti i të rinjve është njohur në rrjetet sociale. Fillimisht ka qenë një ftesë në Instagram, për t’u takuar më pas në kafenetë e Tiranës.

Ai thotë për partnerin e tij:

Kevan është partneri im. Punoj online me fotografi. Jam fotograf dhe editor. Shumicën e kërkesave për punë me vjen nga të huajt. Rutina ime është e njëjtë. E nis si çdo shqiptar. E gjej partnerin aty në krah. I kushtoj kujdes lëkurës. Meshkujt shqiptarë nuk e kuptojnë këtë.

Kevan tregon se rutina është e thjeshtë. Dy partnerët hanë mëngjesin dhe drekën, thuajse gjithmonë bashkë, ndërsa për të gatuar kujdeset amerikani.

Ai thotë:

Jeta ime ështe e thjeshtë. Zgjohem, bëj dush dhe nis të gatuaj. Zakonisht e hamë mëngjesin dhe drekën bashkë. Kur e pashë Renaldon mendova se është i këndshëm dhe thashe nuk kam si të mos e pëlqej. Më pas nisa ta dashuroj.