Shkëlqim Fusha është padyshim njëri ndër persona më të “bekuar” përsa i përket marrjes së tenderave publikë në Shqipëri. Madje bekimi duket se i vjen në doza të mëdha, pasi vetëm në 7 vitet e fundit të pushtetit të Rilindjes rezulton se ka përfituar tendera në vlerë rreth 101 milionë euro. Po, po, e lexuat mirë. Madje nuk ka asnjë gabim, janë plot 101 milion euro të përfituara! Shanset janë që në gjithë jetën tuaj të mos bëni bashkë kurrë as 100 mijë euro, kurse kompania në fjalë ka marrë gati një mijë herë më tepër në vetëm 7 vjet!
Njëri ndër personat që ka kontribuar në shtimin e kësaj shifre është edhe vetë Drejtori i Fondit Shqiptar të Zhvillimit, Dritan Agolli. Ky i fundit nëpërmjet institucionit që drejton ka organizuar një tender me objekt “Rivitalizimi i zonave me potencial të lartë turistik në Rajonin 4 – Për rigjenerimin urban të shëtitores bregdetare qëndore dhe ballinës ujore të Vlorës”. Tenderi në fjalë mban numrin e referencës REF-67386-07-29-2020.
Në të kanë marrë pjesë 4 kompani, nga të cilat fituese është shpallur firma “Fusha” sh.p.k. në pronësi të Shkëlqim Fushës. Por nëse vërejmë vlerat e ofruara nga kompanitë e tjera të skualifikuara, bie në sy oferta e njërës prej tyre e cila është rreth 1 miliardë lekë të vjetra më pak! E kuptoni? Në rastin më të mirë, kompania fituese do të fusë në xhepat e saj rreth 1 miliardë lekë të vjetra!
Sigurisht kompania që ka ofruar këtë vlerë më të ulët është skualifikuar siç ndodh rëndom në raste të tilla. Me sa duket drejtori i Fondit Shqiptar të Zhvillimit Dritan Agolli dhe Shkëlqim Fusha, kanë bashkëpunuar më së miri mes tyre për të futur në xhep të paktën 1 miliardë lekë të vjetra pa u lodhur fare!