JOQ Albania
App Store
SHKARKO
Home
JOQ Albania

Takimi me emigrantët në Athinë, reagon Komuniteti Shqiptar: Rama nuk u takua me ne, por me militantët e PS-së
Shkruar nga: N Hoxha | Publikuar më: 17/09/2020 0:33

  • Share
  • Share
  • Share
  • Share

Kryeministri Rama ka zhvilluar një takim në Athinë me homologun e tij grek Kyriakos Mitsotakis në lidhje me çështejn e detit Jon. Ndërkohë një reagim ka ardhur nga Komuniteti Shqiptar në Greqi për faktin se Rama i shmangu emigrantët dhe u takua vetëm me strukturat e Partisë Socialiste. Sipas Komunitetit Rama nuk u takua me emigrantët shqiptarë, por vetëm me militantët e PS-së si dhe me stafin e kompanisë Top Lines, ku kjo e fundit kryen dhe transportin falas të votuesve të majtë në Shqipëri.

DEKLARATA E PLOTË

Të nderuar bashkatdhetarë, aktivistë, anëtarë të shoqatave që aderojnë në “Komunitetin Shqiptar në Greqi” (ish-FSHSHG). Bordi drejtues ndoqi me shumë vëmendje vizitën e kryeministrit shqiptar në Greqi, të parën në thuajse 8 vjet qeverisje! Në kuadrin e forumit të “Economist” u hodhën hapa të rëndësishëm, si për integrimin e atdheut tonë në familjen europiane, ashtu dhe për mbajtjen e ekuilibrit në marrëdhëniet bilaterale mes dy vendeve fqinje, që për ne janë dy vendet tona.
Ndërkaq, ne u interesuam vazhdimisht për një takim, akoma dhe të shkurtër, me përfaqësues të komunitetit emigrant. Duke qenë tepër të vetëdijshëm se koha ishte e kufizuar, por edhe përgjegjës për situatën e rrezikshme nga covid-19, do të mjaftoheshim me shumë pak përfaqëues e do të siguroheshim se do të respektoheshin të gjitha masat mbrojtëse. Të jeni të bindur se ne do informonim të gjithë anëtarët, shoqatat aderuese si dhe aktivistët për një takim të tillë, sapo të konfirmohej, për të vendosur së bashku përfaqësimin.
POR, por, komuniteti shqiptar në Greqi NUK kishte kurrë një takim me kryeministrin! AS ishte takim me emigrantët që jetojnë e punojnë në Greqi takimi i sotëm i mesditës së 16 shtatorit. Dhe në komunikim me Ambasadën na u bë e qartë se në axhendën e Kryeministrit nuk kishte një takim të tillë. Takimi në fakt u zhvillua me koordinatorët e fushatës elektorale të Partisë Socialiste Athinë e Greqi, dhe me stafin e kompanisë Top Line e cila tradicionalisht kryen dhe transportin falas të votuesve të majtë drejt Shqipërisë sa herë që ka votime.
Mesa duket takimi ishte për startimin e fushatës elektorale. Këtë, madje, e konfirmuan hapur nga kjo strukturë shumë anëtarë e aktivistë që u interesuan për këtë aktivitet. Jo, kryeministri Edi Rama nuk u dha aspak shansin bashkatdhetarëve emigrantë të flisnin! Ose, akoma më keq, kryeministri kujtonte se takonte përfaqësi, por përfaqësuesit e tij në Greqi “e mashtruan”, pak e vështirë për të qenë e vërtetë. Së fundi, për të luftuar disinformimin që bëhet në kurrizin tonë ju ftojmë ta shpërndani këtë informacion në lidhje me këtë injorim të hapur dhe shfrytëzim të përsëritur të emrit e kontributit tonë, nga pala e shtetit shqiptar.
Përzemërsisht, Kryesia e “Komunitetit Shqiptar në Greqi”, ish-FSHSHG