Një person i panjohur tashmë për herë të dytë ka sjell pako me mijëra dosje në zyrat e OVL-UÇK-së. I pari i OVL-UÇK-së, Hysni Gucati në deklaratën e tij të fundit e ka konfirmuar informacionin. Në një paraqitje para mediave kosovare veteranët e luftës kanë publikuar një video ku shihet një person teksa futet qetë me pako në dorë, i le dokumentet dhe largohet. Nuk ka informacion se kush mund të jetë personi. Kujtojmë se javën e kaluar u lanë mbi 4000 dosje me dëshmitarë të Speciales.
“Ka ardhur në 15:30 dhe ka ikë si rrufeja në shpejtësi shumë të madhe ai person , jemi munduar t’i kombinojmë pak me i pa se çfarë ka në to, por emra nuk ka, janë deklarata të dëshmitarëve pa emër, por me shifra”, tha Gucati. “E kemi quajtur rrufeja dy për shkak se ik si rrufeja, por s’kemi arrit me e zënë me e dit kush është. Dy kolegë tanë thuajse veç se kanë kap me dit kush është zotëria, por ka ik. Ne që kemi deklaruar edhe më herët, edhe para 10 ditëve se Specialja bashkëpunon kryesisht me Prokurorinë Serbe, Gjykatën Speciale të Serbisë për krime lufte.Dy-tri fletë që i kam këtu janë në gjuhën serbe dhe në gjuhën angleze, pra që kanë bashëpunu prokurorët serb, një nga ta është zv/prokurori i Gjykatës së Serbisë. Që ka formu dosje e argumente kinse shqiptarët kanë kryer krime”, shtoi ai.