Zyrtarë të Partisë Socialdemokrate, Natyra Kuçi dhe Teutë Rrusta, i kanë ndërpre fjalën kryeministrit Avdullah Hoti, derisa ky i fundit po fliste për dialogun në një tryezë. Kuçi dhe Rrusta në mënyrë simbolike duke i hedhur letra dhe duke fishkëlluar kanë protestuar për numrin e madh të vrasjeve ndaj grave në Kosovë.
“Përderisa dhuna në familje është duke u rritur, ju nuk e keni thënë asnjë fjalë. Grave po iu mohet e drejta e jetës, e pronës dhe krejt këto janë formalisht dhe as ju nuk ish dashtë me e pasë të drejtën me u sill kështu karshi shoqërisë. Për këtë arsye kemi vendosur me ua ndalë fjalën”, ka thënë mes tjerash Rrusta. “Pse dialogu ma i rëndësishëm se jeta e grave”, ka pyetur Kuçi.
“Nuk e gjeni një person që e i mbron të drejtat e grave më shumë se unë… a po doni cdo ditë të jap deklarata, apo i shikoni veprimet”, ka thënë Hoti më pas. Ndërkohë Hoti, ka ndalë sigurimin e vet duke u lejuar anëtarëve të PSD-së ta shprehin revoltën e tyre.