JOQ Albania
App Store
SHKARKO
Home
JOQ Albania

Si vidhet me tenderat e rrugëve/ Skandali i “ALBA-STAR” me asfaltin në 4 Rrugët e Shijakut
Shkruar nga: M Gjini | Publikuar më: 10/09/2020 22:56

  • Share
  • Share
  • Share
  • Share

Shpesh herë kemi paraqitur raste se si firmat e ndryshme fitojnë tendera në formë qokash pasi janë të lidhura me pushtetin. Skema është e thjeshtë. Me letra duket sikur do të bëhet goxha punë, por në fakt puna bëhet gjysmake dhe jashtë standardit. Natyrisht diferenca shkon në xhepat e pjesëmarrësve dhe atyre që kanë dhënë tenderat.

E me sa duket, i tillë është edhe rasti që do t’ju paraqesim në vijim. Bëhet fjalë për një tender me vlerë 95,622,138.60 lekë të reja me TVSH ose rreth 956 milionë lekë të vjetra. Fitues është shpallur firma “ALB-STAR” SHPK e cila ka si pronarë Sadik dhe Idajet Ismailaj. Kjo kompani renditet në ato firma të cilat kanë përfituar më tepër fonde nga shteti.

Kështu vetëm për 5 vitet e fundit rezulton se kjo kompani ka përfituar rreth 44 milionë euro. Jo shaka, apo jo? Por përtej këtyre shifrave stratosferike që ka marrë nga shteti, rezulton se punët e saj në realitet janë ku të thërret qameti. Dhe shembulli më konkret është pikërisht rasti i tenderit që ju përmendëm më lart, me vlerë rreth 956 milionë lekë të vjetra me TVSH.

Bëhet fjalë për procedurën e prokurimit me objekt “Rikonstruksioni i rrugës në aksin 4 Rrugët Shijak – Nishtull Durrës dhe degëzimin e rrugës në ish stacionin zooteknik Xhafzotaj”. Janë vetë qytetarët që i kanë denoncuar punimet skandaloze të kësaj rruge, e cila në vetvete ka një rëndësi të madhe pasi në atë zonë gjendet një numër mjaft i madh biznesesh. Sipas qytetarëve, puna është bërë shkel e shko, tepër shpejt, rruga është e ngushtë si dhe trashësia e asfaltit tepër e vogël.

Me sa duket, më shumë rëndësi ka që "miqtë" e Rilindjes të gostiten siç duhet, sesa të bëhet puna që kanë nevojë qytetarët.