Bayern Munich ka fituar përballë Barcelonës me rezultatin tenistik 8-2 në ndeshjen e vlefshme për çerekfinalet e Champions League.
Bavarezët dominuan nga fillimi i takimit ku pas vetëm 4 minutash gjetën golin e avantazhit me Muller.
Tre minuta më vonë Barcelona barazoi përkohësisht kur mbrojtësi i Bayern Alaba në një tentativë për të larguar topin, e dërgoi atë në portën e tij. Një barazim që do të zgjaste vetëm 15 minuta, kur Perisic riktheu avantazhin për kampionët e Gjermanisë duke i hapur rrugën asaj që do të kthehej në një makth për katalanasit. Bayern shënoi edhe dy herë të tjera në pjesën e parë me Gnabry dhe Muller.
Në pjesën e dytë Luis Suarez riktheu katalanasit në lojë kur ngushtoi shifrat në 2-4, por pjesa e mbetur e ndeshjes do të shihte vetëm Bayern që u tregua i pamëshirshëm duke shënuar edhe katër herë në portën e Ter Stegen. Shënues ishin Kimmich, Lewandowski dhe Coutinho që mbylli llogaritë me një dopietë në minutat e fundit.
Një humje turpëruese për Barcelonën që mbyll në këtë mënyrë një sezon pa asnjë trofe.
Ndërkohë që Bayern, me kualifikimin e arritur për në gjysmëfinale, është kandidat për të përsëritur suksesin e vitit 2013 kur fitoi tripletën. Në gjysmëfinale Bayern do të përballet me fituesin e takimit Manchester City-Lyon, takim që do të luhet nesër.