Të rinjtë italianë duket se janë mërzitur me situatën e shkaktuar nga koronavirusi, dhe të gjitha kufizimet po i quajnë si një mjet që po e përdorin politikanët dhe burokratët për të kontrolluar popullsinë. “E gjithë kjo është punë politike,” shprehet një vajzë, e cila shpjegon se përse janë mbledhur të gjithë dhe po injorojnë distancimin fizik.
Krizat shpesh ekspozojnë ndarjet mes brezave. Një nga më të theksuarat në shoqërinë italiane vitet e fundit ka qenë midis të moshuarve dhe të rinjve, dhe pandemia duket se po e thellon akoma më shumë përçarjen. Të rinjtë italianë shprehen të revoltuar ndaj kontrollit që ushtrojnë mbi atdheun e tyre brezat më të moshuar, pasi tregu i punës favorizon punonjësit ekzistues; Sipas tyre, rregullat e bëjnë të vështirë pushimin e punonjësve, gjë që nuk krijon hapësira dhe mundësi punësimi për të rinjtë.
Gati 30% e italianëve nën moshën 25 vjeç janë të papunë, sipas Eurostat, Zyra Evropiane e Statistikave. Ndërsa edhe ata që janë në punë, kanë kontrata afatshkurtra pa shumë siguri për të ardhmen. Një në tre italianë nën moshën 34 vjeç nuk është në punë, në trajnime ose në arsim me kohë të plotë. Për ata që janë në punë, italianët paguajnë gati 50% më shumë taksa sesa gjeneratat e mëparshme, dhe pensionet shtetërore që do të marrin, do të jenë vetëm gjysma e asaj që marrin prindërit dhe gjyshërit e tyre tani.
Për të vetëpunësuarit dhe ata që përpiqen të drejtojnë biznese të vogla, një ankesë e shpeshtë është se ata nuk mund të sigurojnë komisione publike fitimprurëse, sepse ato u jepen njerëzve me lidhje, një sistem patronazhi që favorizon më të moshuarit. Italia u bë epiqendra e parë e Evropës që në momentin kur shpërtheu pandemia e koronavirusit. Të rinjtë fillimisht i ndoqën dhe i zbatuan me seriozitet rregullat, duke ngjallur një ndjenjë solidariteti kombëtar, e cila mendohej se kishte vdekur në Italinë e sotme. Italianët treguan solidaritet gjatë periudhës më të rëndë të pandemisë, megjithatë durimi filloi të humbte te një pjesë e mirë e popullsisë, sidomos tek të rinjtë.
Burimi:Voa|Përktheu dhe Përshtati: JOQ Albania