Shqiptarët po heqin picirin në tentativë për të kaluar kufirin në pikën kufitare të Kakavijës. Radhët kilometrike të automjeteve i kanë lënë me ditë të tëra duke pritur në doganë. Teksa prisnin zgjidhje nga policia, ata u janë hakërryer me tone të ashpra duke iu drejtuar se s’janë të aftë të ndihmojnë popullin që i paguan, por e kanë mendjen të pinë birra!
Ata kanë shpërthyer në ulërima duke i kërkuar që vetë Rama të shkojë të shikojë situatën dhe të zgjidhë hallin e popullit, meqenëse dje kishte vizituar Gjirokastrën dhe më pas ishte drejtuar për Jalë. Shteti grek njoftoi numrin e pakët të qytetarëve që do kalonin kufirin nga Kapshtica dhe Kakavija në një limit prej 750 personash, nisur nga data 16 Gusht dhe vetëm për ata që kishin rezultat negativ të tamponit për Covid-19. Kjo gjë ka sjellë dyndje në dogana sidomos të shqiptarëve që hynë në territorin shqiptar dhe tani kërkojnë të rikthehen në Greqi pa filluar kuadri i masave shtrënguese.
Sipas të dhënave kufitare shqiptare në ditët e para të gushtit kanë hyrë ne territorin shqiptar disa dhjetëra mijëra emigrantë të cilët do të gjejnë vështirësi te sigurojnë në Shqipëri testin molekular për “Covid 19” dhe më pas të rikthehen në Greqi.