Sulmuesi i kombëtares shqiptare, Florian Kamberi ka ndryshuar sërish destinacion këtë merkato vere. Futbollisti ka lënë Skocinë dhe ka firmosur për 3 vite me klubin zviceran të Sent Galenit.
Vetë klubi helvet konfirmoi lajmin në faqen zyrtare. Kalimi i Kamberit te Sent Galeni ishte paralajmëruar prej kohësh në mediat skoceze.
Lojtari kishte refuzuar kontratën 2-vjeçare me Glasgou Rangersin, ndërsa klubi i tij Hibernian nuk pranoi ta rikthente për sezonin e ri pasi lojtari deklaroi se kishte realizuar ëndrrën e tij kur kaloi në formë huazimi te Rangersi në janar.
Për Kamberin kishte oferta nga Gjermania dhe Anglia, por sulmuesi vendosi të kthehej në Zvicër, aty ku edhe është formuar si futbollist.
Kujtojmë që Kamberi është prurja e re e trajnerit Edi Reja në kombëtaren shqiptare, por ai ende nuk e ka bërë debutimin e tij me kuqezinjtë.