Do të ekstradohet drejt Gjermanisë 24-vjeçari nga Taxhikistani i identifikuar si Komron Zukhurov. 24-vjeçari, u arrestua në Tiranë nga Drejtoria e antiterrorit në bashkëpunim me Interpol Tirana.
I riu kërkohej nga policia gjermane për akte terroriste.
Ai njihet si kunati i ish-deputetit të PD Asllan Dogjani, pasi ka jetuar në banesën e tij dhe ky i fundit është edhe avokati i tij mbrojtës.
Zukhurov u prangos nga anti-terrori si pjesëtar i ISIS i kërkuar nga Gjermania për akte terroriste ndërsa celula dyshohet se do të kryente aktivitet terrorist edhe në Shqipëri.
Njoftimi:
Interpol Tirana ka kryer dje ekstradimin drejt Gjermanisë, të shtetasit Komron Zukhurov, 24 vjeç, lindur në Dushanbe, Taxhikistan.
Ky shtetas është kapur më datë 29.04.2020, nga Drejtoria e Antiterrorit, Tiranë, pas një punë investigative dhe falë shkëmbimit me homologët e antiterrorit në Gjermani.
Ky shtetas ishte i shpallur në kërkim ndërkombëtar nga Interpol Wiesbaden, Gjermani, pasi autoritetet gjyqësore të Gjykatës Federale në Karlsruhe, me vendim Nr. 2 BGs 245/20 datë 21.04.2020, kanë lëshuar urdhrin e arrestit ndërkombëtar për veprën penale “Anëtar i një organizate të huaj terroriste” parashikuar nga Kodi Penal gjerman.
Rrethanat e ngjarjes: Ky shtetas, së bashku me personat e tjerë të akuzuar, i udhëhequr nga një besim radikal fondamentalist, ngriti një qelizë në territorin e Republikës Federale të Gjermanisë, me qëllim që të ndërmerrte ‘xhihad’ në emër të “IS”, në kuptimin e një lufte të armatosur kundër ‘jobesimtarëve’, në Gjermani dhe jashtë saj, me qëllim kryerjen e sulmeve në Gjermani ose Taxhikistan duke përdorur armë zjarri dhe eksplozivë.
Si rezultat i bashkëpunimit të Interpol Tirana me Interpol Wiesbaden/Gjermani u bë i mundur ekstradimi i tij drejt Gjermanisë.