Çudirat shqiptare me të vërtetë që nuk paskan fund. Fundja nuk ka pse të mos ndodhë kështu. Jetojmë në një vend ku krimineli dhe “i forti” vlerësohen ndërsa i afti, punëtori dhe ai që zbaton rregullat e ligjet, trajtohen si budallenj. Gallata më e fundit në këtë vorbull çmendurie që na rrethon prej kohësh, është tenderi më i fundit i shoqërisë ALBCONTROL.
Nëse nuk e dini, ALBONTROL është një shoqëri aksionare me kapital 100% shtetëror. Kjo shoqëri u krijua si ndërmarrje shtetërore në vitin 1992 dhe, në 3 shkurt 1999, u transformua në shoqëri aksionare, e quajtur Agjencia Nacionale e Trafikut Ajror. ALBCONTROL menaxhon dhe kontrollon hapësirën ajrore Shqiptare (FIR), në përputhje me standartet ndërkombëtare të lundrimit ajror.
Kjo kompani, ka organizuar një tender me objekt : “Shërbimi i ruajtjes me roje private të Albcontrol sha”, me vlerë limit 9,124,407 lekë pa TVSH, i cili mban numrin e referencës REF-61368-06-16-2020. Në këtë procedurë prokurimi mësohet se kanë marrë pjesë tre kompani, përkatësisht “SH.P.S.F. “Nazeri 2000” sh.p.k. me vlerë të ofruar 8.992.387,65 lekë pa tvsh, “Vrana Security Group” sh.p.k. me vlerë të ofruar 9,000,000 lekë pa tvsh dhe “Kumria 1” sh.p.k e cila nuk ka paraqitur fare ofertë ekonomike.
Fitues është shapllur “SH.P.S.F. “Nazeri 2000” sh.p.k. me pronar Durim Nazëraj, me një vlerë rreth 107 milionë lekë të vjetra me TVSH. Shihet qartësisht se diferenca mes kësaj kompanie dhe kompanisë me vlerën më të afërt është vetëm 76 mijë lekë të vjetra. Ndërsa diferenca e fituesit me fondin limit është vetëm 1 milion e 300 mijë lekë të vjetra, ose e shprehur ndryshe, vlera e ofruar nga fituesi është sa 98,55% e fondit limit.
Duke patur parasysh diferencat e mësipërme dhe faktin se firma e tretë pjesëmarrëse nuk ofroi fare vlerë ekonomike, lindin dyshime mbi procedurën e tenderit. Nga ana tjetër, fituesi “SH.P.S.F. “Nazeri 2000” sh.p.k rezulton se është një nga kompanitë e cila ka përfituar një lumë tenderash nga institucionet shtetërore. Kështu në vetëm 8 vitet e fundit, kjo kompani ka përfituar rreth 5 miliardë lekë të vjetra.
Gjithashtu kjo kompani ka qenë e lakuar disa herë si një kompani të cilës shpesh i ndodhnin incidente me përgjegjësitë që kishte në ruajtje. Rasti më i bujshëm është ai i grabites së rreth 10 milionë eurove në aeroportin e Rinasit në muajin prill të 2019. Dhe tani paradoksi qëndron në faktin se kjo kompani, do të jetë përgjegjëse për ruajtjen e shoqërisë ALBCONTROL, e cila nga ana e saj menaxhon dhe kontrollon hapësirën ajrore Shqiptare.