Si po kaloni? Një pyetje kisha. A ju kanë dhënë leje për pushime këtë vit në punë? Dhe nëse ju kanë dhënë, a e keni mundësinë financiare për të përballuar të paktën një javë pushime në bregdetin e vendit? Me shumë mundësi përgjigjia është jo, për shkak të krizës ekonomike që ka mbërthyer thuajse çdo aspekt të jetës së vendit.
Dhe me sa duket Edi Rama dhe shpura e tij nuk e kanë vënë fare ”ujin në zjarr” për ju që t’ju ndihmojnë të dilni nga kjo krizë. Dini ndonjë reformë ekonomike përveçse “fjalëve në hava”? Edhe në këtë rast me shumë mundësi përgjigjia është jo. Dhe normalisht nuk kanë përse ta vrasin fare mendjen për ju, duke patur parasysh se sa shumë fitojnë nga paratë që shpërndajnë për tendera nga më të ndryshmit e shpesh edhe të pabesueshëm.
Dhe siç shpesh e kemi përmendur, një nga “çunat e shkathët” të Rilindjes është edhe Laert Duraj, drejtori i Postës Shqiptare. Nëse keni një gjysh apo një gjyshe në shtëpi, shumë herë do t’ju kenë rënë në vesh ankesat e tyre për pritjen në rradhë me orë të tëra në zyrat e Postës Shqiptare për të marrë atë pension të shkretë që nuk u del as për gjysmën e ilaçeve.
Por nëse gjyshërit tuaj, ndoshta edhe prindërit, apo edhe ju vetë nëse ju ka rastisur të merrni ndonjë pako tek këto zyra, keni pritur në diell dhe në rradhë, Laert Duraj ka qenë diku tjetër. Në krye të detyrës do të pyesni ju? Jo tamam në fakt.
Laert Duraj është fotografuar ditën e sotme në një nga resortet më të shtrenjta në plazhet e Jugut, aty ku një dhomë kushton gati 400 euro nata. Po, po, e lexuat mirë. Dhoma e Laertit për një natë kushton afërsisht sa pensionet e katër gjyshërve të marra së bashku. Nga fotot duket se Laerti po bën një jetë prej “Pashai”, jo thjesht për çmimin e dhomës, por edhe për mënyrën se si po shijon i qetë gotën që mban në dorë. Rrini ju në rradhë, rrini.