Një ngjarje e rëndë u raportua mbrëmjen e djeshme në Kombinat të Tiranës. Nëna dhe dy vajzat e saj u vetëflijuan, pasi besonin te Ringjallja, duke qenë pjesë e Dëshmitarëve të Jehovait.
Zhaneta Josifi dhe Anisa Josifi humbën jetën, ndërsa Blerata Josifi arriti të shpëtonte.
Mësohet se Anisa Josifi kishte vdekur që 15 muaj më parë, por ajo mbahej në banesë nga nëna dhe motra.
Lidhur me këtë ngjarje të rëndë kanë shkruar edhe mediat greke.
“Zougla” ka nisur raportimin e saj duke shkruar:
Nuk mund të imagjinohet nga mendjet njerëzore ajo që ndodhi dje në Tiranë!
Më tej vazhdon:
Sipas mediave në vendin fqinj, tre gra, një nënë dhe dy vajza, besimtare të fesë së Dëshmitarëve të Jehovait, vendosën të sakrifikojnë veten për ” t’u ringjallur” dhe për të arritur jetën e përjetshme që pretendon ky sekt fetar. Si rezultat, 56-vjeçarja Zhaneta dhe vajza e saj Anisa u gjetën të vdekur në shtëpinë e tyre në Tiranë, ndërsa motra e vogël Bletra u dërgua në spital në gjendje kritike, për shkak të mosngrënies për një kohë të gjatë. E reja i tha policisë: Ju nuk mund t’i kuptoni sakrificat tona për të arritur në këtë pikë. Sipas të dhënave të para mjekësore, Anisa dyshohet se ka vdekur shumë kohë më parë, ndërsa trupi ishte mbajtur në shtratin e saj nga nëna dhe motra, në pritje të “ringjalljes”, duke përdorur solucione të ndryshme me qëllim mos dekompozimin e trupit.