Një ngjarje e rëndë u regjistrua pak orë më parë në Kombinat të Tiranës.
Nënë e bijë, Zhaneta Josifi dhe Anisa Josifi, u gjetën të pajeta në banesën e tyre, ndërsa vajza tjetër 34 vjeçe, Blerta Josifi është dërguar me urgjencë në spital.
Mësohet se ato janë vetëflijuar, pasi besonin te ringjallja pas vdekjes. Viktimat ishin dëshmitare të Jehovait.
Lidhur me ngjarjen ka reaguar edhe Drejtori i Policisë së Tiranës, Rebani Jaupi. Jaupi shprehet se vajza e pajetë është gjetur e mbuluar me jorgan në një divan, ndërkohë që vajza tjetër është gjendur në gjendje kritike për jetën.
Jaupi tha se të dyja ishin të arsimuara, por të papuna.
Deklarata e Rebani Jaupit:
Vëllai i viktimës ka njoftuar se nuk ka pasur kontakt prej tre ditësh me motrën dhe dy mbesat, që nuk i përgjigjen në telefon. Është njoftuar zjarrfikësja. Kemi hyrë nga dritarja e tualetit të banesës. Sapo hymë në banesë konstatuam të zonjën e shtëpisë të vdekur, një nga vajzat në gjendje kritike dhe në një ambient tjetër në krevat është gjetur e mbuluar me batanije dhe me jorgan vajza tjetër 30 vjeçare pa shenja jete. U krijua grupi hetimor dhe po kryhen veprime në vendngjarje.
Paraprakisht eksperti konstatoi se dy viktimat nuk kanë shenja dhune dhe mund të jenë vetëflijuar. Grupi hetimor po vazhdon hetimet. Paraprakisht, mendohet për një vetëflijim, nuk kanë shenja. Kemi gjetur shënime të ndryshme, fetare. Do të bëhet ekspertimi i telefonave dhe kompjuterave që janë gjetur në banesë. Vajzat të dyja të arsimuara dhe kanë qenë të papuna. Ka shenja të mosushqyerje të ditëve të fundit.