Tenderat janë kthyer në burim pasurimi për shumë zyrtarë e biznesmenë, të cilët vjedhin qytetarët shqiptarë, përmes tyre. Kontratat me shifra të fryra dhe të lidhura me marrëveshje sekrete po i shkaktojnë miliarda lekë dëm ekonomik shtetit.
“Gazeta Atdheu” raportoi një ditë më parë për një tender të Agjencisë së Blerjeve të Përqendruara, që pagoi rreth 360 milionë Lekë te një kompani për të blerë qumësht e vezë. Qindra miliona ka harxhuar një tjetër institucion shtetëror në një tender për blerje rrobash.
Sipas dokumenteve zyrtare, Autoriteti Portual Durrës ka lidhur një kontratë me kompaninë “Univers Promotions”, për blerjen e veshmbathjeve. Institucioni i drejtuar nga Pirro Vëngu, njeriu që jo shumë kohë më parë ka mbajtur postin e drejtorit Anti-korrupsionit në Kryeministri, do ti paguajë kompanisë fituese të tenderit shumën e majme prej rreth 220 milionë Lekësh. Dhe të gjitha këto para për të blerë… rroba!
Nga verifikimet në Qendrën Kombëtare të Biznesit, firma fituese zotërohet nga 3 bashkëpronarë, Klodian Haxhiu Flamur Salija dhe Beqir Nuredini, ish-kryebashkiaku i Rrogozhinës. Kujtojmë se Nuredini u zgjodh kryetar i Bashkisë së Rrogozhinës në zgjedhjet e 21 qershorit 2015, si përfaqësues i Partisë për Drejtësi, Integrim dhe Unitet, PDIU dhe Aleancës për Shqipërinë Europiane. Ai fitoi kundrejt rivalit të tij në garë me 55.13% të votave. Nuredini rezulton pronari i disa bizneseve në vend, referuar të dhënave në QKB.
Edhe njëherë u dëshmua se bashkëpunimi mes kundërshtarëve politik është shumë i lehtë kur bëhet fjalë për të futur para në xhep. Por, që paraja nuk ka dallime politike, këtë duket se e di shumë mirë ish-drejtori i zyrës së Ramës, Pirro Vëngu, që së fundmi ka lidhur kontrata me shifra të majme, në tendera të ndryshëm. Duket se filozofia KÇK – Kap Ça të Kapësh, i rri ‘fit’ Pirros, ashtu si rrobat me vlerë 220 milionë Lekë që do veshin punonjësit e portit, e do duken si pëllumba…