Të paktën 19 persona kanë humbur jetën tragjikisht dhe 6 të tjerë u plagosën pas një shpërthimi në një klinikë mjekësore.
Ngjarja e rëndë ndodhi mbrëmjen e së martës në veri të kryeqytetit iranian, Teheran.
Sipas mediave iraniane, shpërthimi u shkaktua nga një rrjedhje gazi.
Fillimisht u raportua se 10 gra dhe 3 burra kishin vdekur në shpërthimin në qendrën shëndetësore "Hamid Reza Goudarzi", por bilanci është bërë akoma më tragjik.
Prokurori i Teheranit, Ali al-Qasi Mehr, njoftoi se vdekjet erdhën si pasojë e shpërthimit dhe zjarrit pasues, duke thënë se 15 gra dhe katër burra mbetën të vdekur.
Ai tha se origjina e shpërthimit ishin tre bombola oksigjeni në sallën e operacionit të klinikës.
Përveç 19 personave të vdekur, është raportuar edhe për 6 të plagosur, të cilët janë dërguar me urgjencë në spital.
Raportohet se zjarrfikësit kanë mundur të shpëtojnë 20 persona të tjerë nga flakët.
Disa nga viktimat ishin në katet e sipërme në dhomat e operacionit, të cilët ishin ose pacientë ose të afërm të personave të shtruar.
U deshën më shumë se dy orë që forcat zjarrfikëse të bëjnë të mundur shuarjen e flakëve.
Në rrjetet sociale janë publikuar edhe pamje nga vendngjarja, ku shihen forcat zjarrfikëse që përdorin shkallër për të hyrë në çatinë e ndërtesës. Të tjera pamje tregojnë njerëz të bllokuar në dritaren e klinikës, të cilët kërkonin ndihmë.
Shpërthimi ishte aq i fuqishëm saqë dëmtoi edhe dy ndërtesa që ishin ngjitur.
Klinika, e cila kishte një staf të përbërë nga 25 persona të punësuar në momentin e shpërthimit, kryen operacione të lehta dhe grafi mjekësore.
Incidenti vjen katër ditë pasi një shpërthim pranë një kompleksi ushtarak tronditi kryeqytetin iranian, ku sipas informacioneve zyrtare nuk pati viktima.
Burimi: Daily Mail|Përktheu dhe Përshtati: JOQ Albania